La Conferenza Mondial in sui Dirits Uman ‘RightsCon2020’

de la Simona Scuri*

Quest ann (2020), per via del virus, la nona edizion de la Conferenza Mondial in sui Dirits Uman RightsCon, prevista in Costa Rica, l’è staita trasformada ind un grand event online, del 27 a’l 31 de Lui.

L’Associazion per la Lengua Lombarda Far Lombard l’è staita invidada dei dirijents de la Fondazion Wikitongues – el Daniel Bögre Udell e la Kristen Tcherneshoff – per questa conferenza qe la g’ha havud plussee de 200 ascoltador. L’associazion, per mez de la soa portavox, a l’è staita invidada a parlar dei so ativitaa editoriai realizade cont i instruments dijitai, del recuper dei parlants ind la rejon lombardofona e de la situazion lejislativa atual concernenta la lengua lombarda.

La lengua lombarda a l’è in pericol d’estinzion e a l’è miga recognossuda dei stats indovè qe a l’è parlada, né del stat italian, né de la Confederazion Svizera. A l’è anca per quest qe a l’è staita ojet de l’enconter ospitad a RightsCon. Insema ai moderador de Wikitongues, g’era el lenguista Michel De Graf del MIT Massachusetts Institute of Technology, la Elisabeth Pierite-Mora e la Simona Scuri.

El prim l’ha parlad de la lengua haitian kreyòl, la segonda de la lengua tunica-biloxi (parlada in Mississipi e in Louisiana) e l’ultema del lombard. La prima conferenza RightsCon a l’è staita faita ind el 2012 cont 400 partecipants ind la Silicon Valley (USA), San Francisco e despœ ind i ann adree a Rio de Janeiro, a Manila, a Toronto e a Brussel cont 1500 partecipants, 700 organizazion de 105 paes.

2019 a Tunis

Le mani umane che formano i diritti umani o human rights

L’ann passad l’edizion RightsCon l’era ospitada a Tunis. Ind i tavole redonde s’inn incontrads i referents dei Nazion Unide, i Minister per la Cultura e per la Comunegazion ma anca imprendidor, academeg, rapresentants dei governa, jornalista e ativista. I partecipants quest ann (2020) inn staits in total 7.828 in cinq dì, provenients de 158 paes diferents e donca de diverse zone orarie del mond. I events inn staits incirca 300, tuts perfeitament organizads in su la piataforma.

I relador hann fait el pont in sul status dei dirits uman intra ai quai anca i dirits lenguisteg. I argoments tratads inn staits: elezion, contestazion, partecipazion, controll de la comunegazion a’l temp del Covid-19, sanitaa, justizia razial, oppression politega, marjinalizazion, vox sota-representade, dirits dei indijen, dei disabel, sostenibilitaa ambiental e anca sostenibilitaa e diversitaa lenguistega.

La lengua lombarda a l’è in pericol d’estinzion

Argoments calds, ligads a l’epoca dijital e ai so instruments, hann trovad el so spazi de dibatit, tant mè migrazion, disinformazion, aree de conflit ind el mond, dirits dei done, dirits sociai, dirits de riservateza (privacy), protezion dei data personai, sistema nazional de controll, bloc de l’internet in certs paes del mond, jener e sessualitaa. A g’era dei enconter publeg, dei enconter stratejeg e limitads a poqe persone, dei enconter de comunitaa specifege, dei laboratori de scambi, enconter de grup e enconter privads. Un quai document a l’è anca rejistrad e disponibel online in sul canal YouTube de l’organizazion RightsCon.

Partecipants

Intra i partecipants pœdi citar el Brad Smith, President de la Microsoft; el Niklas Zennström, CEO de Atomico, Co-fondador de Skype; el David Kaye, UN Special Rapporteur in su la promozion e la protezion del dirit de libertaa de opinion e espression; el Will Cathcart, cap del WhatsApp e del Facebook. Poder parlar, grazia a Wikitongues, de dirits lenguisteg, de ativitaa, de impegn, de resultads anca per el lombard a l’è stait segurament un bella oportunitaa.

RightsCon Online l’è una resposta poderosa a la necessitaa de la societaa civil de incontrar-s e de ativar-s anca a distanza e al representa la forza, la resistenza e la solidarietaa de la comunitaa mondial invers ai problema dei dirits uman, intra i quai, anca la libertaa de espression ind una lengua rejonal recognossuda dei lenguista a nivell mondial ma descriminada dei politege dei stats, el lombard.

*Simona Scuri l’è de Far Lombard, Associazion per la Lengua Lombarda